(Daawo Video) Jaaliyada Gobolka Sool Ee Ku Dhaqan Wadanka Biljan Oo Deeq Soo Gaadhsiiyey Cisbitaalka Dhexe Ee Magaalada Laascaanood‏
Jaaliyada u dhalay Gobolka Sool ee ku dhaqan Wadanka Biljan ayaa deeq lacageed soo gaadhsiiyey Cisbitaalka Dhexe ee Magaalada Laascaanood, iyadoona deeqdaasi ay u soo wakiisheen Maxamuud Cige oo kamid ah Jaaliyada Wadanka Biljan. Maxamed Cige ayaa deeqdani ku wareejiyey Sheekh Cali C/ Nuur Xaashi (Cali Dheere) oo kamid ah ganacsatada ku dhaqan Magaalada Laascaanood ee xarunta Gobolka Sool.
Deeqdan oo ka koobnayd 500 oo Doollar ayaa waxa dadka bukaan jiifka ah ee ku jira Cisbitaalka Dhexe ee Magaalada Laascaanood loogu iibiyey 32 furaash oo ay ku jiifsadaan dadka bukaan jiifku. Hadaba waxaa ugu horeynba halkaasi ka hadlay Sheekh Cali C/ Nuur Xaashi (Cali Dheere) oo ah mas'uulka loo xil saaray inuu deeqdani gaadhsiiyo dadka bukaan jiifka ah, isagoona u mahad celiyey cidii soo dirtay deeqdani.
Sidoo kale waxaa isna halkaasi ka hadlay Agaasimaha Cisbitaalka Guud ee Magaalada Laascaanood Dr. Ismaaciil ILkacase, isagoona si weyn usoo dhoweeyey deeqdani isla mar ahaan taana sheegay in xiligan loo baahan yahay in dadka bukaan jiifka ah ee ku jira Cisbitaalka laga taageero dhinacyo badan maadaama ay jirto baahi aad u weyn.
Hadaba muuqaalka deeqdani iyo sida loo gaadhsiiyey Cisbitaalkaba Halkan Hoose Ka Daawo.
Si kastaba ha ahaatee deeqdani ayaa qayb ka noqonaysa deeqo kala duwan kuwaas oo dhamaantood jaaliyada kasoo jeeda Gobolka Sool ay soo gaadhsiiyeen Cisbitaalka Dhexe ee Magaalada Laascaanood iyo waliba dadka bukaan jiifka ah ee iyagu ku jira Cisbitaalka.
