Sheekh Axmed Madoobe oo ka hadlay dagaal culus oo ka dhacay gobolka Jubbada hoose iyo Al-shabaab oo sheegtay…
Wararka naga soo gaaraya degmada Afmadow ee gobolka Jubbada hoose ayaa waxay sheegayaan in dagaal culus oo u dhexeeyay ciidamada dowladda KMG, kuwa Raaskaambooni iyo Kenya oo dhinac ah iyo kuwa Xarakada Al-shabaab oo dhinac ah ayaa shalay ka dhacay deegaan lagu magacaabo Harboole oo hoostaga degmada Afmadow ee gobolka jubada hoose.
Sida warku sheegayo dagaalka oo ahaa mid culus ayaa qarxay ka dib markii ciidamada isbaheysiga ah ay weerar ku qaadeen saldhig ay deegaankaasi ku lahaayeen xoogagga Al-shabaab, waxaana lagu soo waramayaa inuu halkaasi kadhacay dagaal xooggan oo labada dhinac ay isu adeegsanayaan hubka noocyadiisa kala duwan, iyadoo la sheegay in dhinacyadii dagaalamayna uu soo kala gaaray khasaare kala duwan, waxaana la sheegay in dagaalka ay ku dhinteen ugu yaraan 10-ruux oo dhinacyadii dagaalamay ah.
Dagaalka ayaa waxaa siyaabo kala duwan uga hadlay dhinacyadii dagaalamay oo uu mid waliba sheegay inuu dagaalka isagu ku guuleystay, isla markaasna deegaankii lagu dagaalamay uu isagu ku suganyahay, inkastoo saraakiisha dowladda KMG ay si gaar ah u sheegteen inay qabsadeen sida ay ku doodeen deegaankii uu dagaalku ka dhacay, isla markaasna ciidamadii ka soo horjeeday ay kala wareegeen hub, ayna ka dileen askar badan sida ay yiraahdeen.
Dhinaca kale Sheekh Axmed Madoobe oo ah Guddoomiyaha ururka Raaskambooni ayaa sheegay in magaalada Kismaayo ay rajeynayaan inay maamlmo gudaheed ay gacanta u soo gasho, waxa uu sheegey inay hadda u jiraan sida uu yiri 82-Km oo keliya, wuxuuna xusay inay wadaan dhaqdhaqaaqyadii ugu dambeeyay ee ay kula wareegi lahaayeen magaalada Kismaayo ee xarunta gobolka Jubbada hoose.
